Bota e futbollit vijon të jetë e tronditur nga ndarja tragjike nga jeta e Alexander Manninger, ish-portierit të Juventus, Fiorentina dhe Siena, i cili humbi jetën më 16 prill pas një aksidenti me tren në një kalim hekurudhor pa barriera në Nussdorf am Haunsberg.
Pas disa ditësh heshtje, bashkëshortja e tij, Emily Manninger, ka reaguar përmes një mesazhi të gjatë dhe emocional në rrjetet sociale, duke ndarë dhimbjen e madhe që po përjeton familja.
Në letrën e publikuar në Facebook, ajo shkruan: “Alex, nuk arrij ta përshkruaj dhimbjen e paimagjinueshme që po ndiej. Nuk jemi familje që e ndajmë publikisht këtë dhimbje, por nuk kam zgjedhje… Mendoj se është e rëndësishme të tregoj çfarë njeriu ishe në shtëpi. Sot jam në shtëpi me familjen, duke u përpjekur të kuptoj se ky është realiteti ynë…”.
Ajo kujton me dashuri rolin e tij si bashkëshort dhe baba: “Faleminderit për dy djemtë tanë, Alexander dhe Nicolas. Ishe babai më i jashtëzakonshëm. Të isha gruaja jote ishte privilegj. Ti ishe jo vetëm burri im, por edhe miku im më i mirë. Kishim një jetë kaq perfekte”.
Mesazhi përmbyllet me fjalë prekëse, që pasqyrojnë dhimbjen dhe forcën për të vazhduar përpara: “Lajmi më shkatërroi, por duhet të jem e fortë për ty dhe fëmijët tanë. Nuk besoj se e meritojmë këtë… Derisa të takohemi sërish, do të të dua përgjithmonë”.