Travis Scott dhe Drake janë paditur për incidentin në Astroworld të premten e 6 nëntorit ku u shkaktuan 8 viktima. Avokati i Teksasit, Thomas J. Henry ngriti një padi të dielën kundër reperëve. Sipas një raporti nga “The Daily Mail”, padia është ngritur në emër të një pjesëmarrësi në koncert, Kristian Paredes, 23 vjeç, nga Austin. Paredes thuhet se ka paraqitur ankesën duke kërkuar më shumë se një milion dollarë dëmshpërblim pasi dy reperët dyshohet se “nxitën turmën” ku ai u plagos.
Në një konferencë për shtyp të shtunën pasdite, kryebashkiaku i Huston, Sylvester Turner konfirmoi se ndërsa mosha e një prej të vdekurve mbetet akoma e pazbardhur, viktimat e tjera ishin 14, 16, 21, 21, 23, 23 dhe 27 vjeç.
Në një deklaratë për shtyp kur njoftoi padinë e ngritur, Henry vuri në dukje se Drake dhe Scott vazhduan të performonin edhe kur automjetet u përpoqën të depërtonin nëpër turmë për të ndihmuar ata që ishin plagosur dhe të tjerët kërkuan që shfaqja të ndalohej.
“Performancat muzikore live kanë për qëllim të frymëzojnë, jo të sjellin tragjedi,” tha Henry në një deklaratë për shtyp. “Shumë nga këta pjesëmarrës e prisnin këtë ngjarje për muaj të tërë dhe ata meritonin një mjedis të sigurt në të cilin të argëtoheshin dhe të shijonin mbrëmjen. Në vend të kësaj, nata e tyre ishte plot me frikë, lëndim dhe vdekje”, vazhdoi ai.