Ministrja për Evropën dhe Punët e Jashtme, Olta Xhaçka ka shprehur ngushëllimet për tragjedinë e ndodhur në Ukrainë ku si pasojë e rrëzimit të një avioni mbi kopshtin e fëmijëve, kanë humbur jetën 18 persona, mes tyre disa fëmijë, ministri i Brendshëm i Ukrainës dhe zyrtarë të tjerë qeveritarë.
“Ngushëllime të sinqerta e të përzemërta për qeverinë dhe popullin e Ukrainës, pas humbjes tragjike të jetëve të Ministrit të Brendshëm Denys Monastyrsky, zyrtarëve të tjerë dhe civilëve, përfshirë fëmijë pas rrëzimit të helikopterit në afërsi të Kiev. Zemrat dhe lutjet tona shkojnë për popullin e Ukrainës”,-shkruan Xhaçka në Twitter.
Rritet numri i jetëve të humbura nga rrëzimi i helikopterit në Brovary të Ukrainës. Sipas kreut të Administratës Ushtarake Rajonale të Kievit, janë 18 viktima. Oleksiy Kuleba në një postim në rrjetet sociale tha tre nga të vrarët janë fëmijë.
Kuleba shtoi se 29 persona janë plagosur, mes tyre 15 fëmijë. Mes viktimave është edhe ministri i Brendshëm ukrainas Denis Monastyrsky dhe ekipi drejtues i Ministrisë së Brendshme të Ukrainës.
Anton Gerashchenko, një këshilltar i Ministrit të Brendshëm të Ukrainës, postoi në mediat sociale se Monastyrsky, zëvendësministri Yevheniy Yenin dhe sekretari i shtetit Yuriy Lubkovychis vdiqën në aksident. Ministri i Brendshëm, Denys Monastyrskyi ishte rrugës për në një “pikë të nxehtë” të luftës kur helikopteri i tij u rrëzua.