Një traget pasagjerësh i kompanisë Filo Shipping u përmbys në brigjet e Qipros, pak pas nisjes nga porti i Kyrenia (Girne), në pjesën veriore të ishullit.
Sipas autoriteteve lokale, të paktën gjashtë persona kanë humbur jetën deri më tani, ndërsa 159 nga 270 pasagjerët dhe anëtarët e ekuipazhit janë shpëtuar deri më tani. Lajmi është bërë i ditur nga Murat Şenkul, kryetari i bashkisë së Kyrenias, nga ku ishte nisur trageti.
Operacionet e kërkim-shpëtimit nisën menjëherë pas aksidentit dhe vazhdojnë ende, me pjesëmarrjen e një tjetër anijeje dhe një helikopteri.
Trageti ishte nisur drejt portit turk të Taşucut, por u përmbys pak pasi la portin. Shkaqet e incidentit nuk janë bërë ende të ditura.
Ministria e Shëndetësisë deklaroi se janë marrë të gjitha masat e nevojshme për të garantuar një reagim të shpejtë nga ekipet e shpëtimit dhe shërbimet mjekësore.
Pamjet e transmetuara nga mediat turke tregojnë tragetin e përmbysur në ujë, ndërsa disa prej personave në bord shihen me jelekë shpëtimi. Në zonë ndodheshin edhe disa anije që iu bashkuan operacioneve të shpëtimit.
Në momentin e aksidentit, kushtet atmosferike ishin të mira dhe moti ishte i kthjellët. Autoritetet vijojnë hetimet për të përcaktuar shkaqet e përmbysjes së tragetit.