Një ngjarje e rëndë ka ndodhur në Loutraki, Greqi, ku një 17-vjeçar humbi jetën si pasojë e plagëve të marra nga thika, ndërsa një 19-vjeçar u dërgua i plagosur në spital. Ngjarja ka ndodhur në orët e hershme të mëngjesit, në një rrugë të qytetit, dhe policia greke po kryen hetime intensive për të zbardhur rrethanat e sakta.
Sipas informacioneve, 17-vjeçari u gjet i plagosur rëndë dhe u transportua në spital nga i vëllai i tij, por nuk mundi t’iu mbijetojë plagëve. Mediet lokale greke shkruajnë se ai është shqiptar.
Në të njëjtën kohë, një 19-vjeçar u paraqit pranë spitalit të Loutrakit me plagë nga thika, por ai pretendoi se ishte plagosur në një aksident rrugor. Megjithatë, mjekët e trajtuan dhe konfirmuan se plagët ishin të shkaktuara nga thika dhe jo nga një aksident.
Mjekët dhe më pas policia dyshojnë se 19-vjeçari po ashtu ishte plagosur gjatë sherrit me thikë me 17-vjeçarin dhe po tentonte të fshihte atë që kishte ndodhur. As i vëllai i viktimës dhe as i plagosuri nuk kanë dhënë një version të qartë për atë që ndodhi.
Autoritetet policore po vazhdojnë hetimet për të mbledhur dëshmi dhe për të kuptuar nëse ka pasur persona të tjerë të përfshirë në këtë incident. Hetimi përfshin intervistimin e dëshmitarëve, analizimin e vendit të ngjarjes dhe provave të tjera fizike, që mund të ndihmojnë në sqarimin e ngjarjes.