Kur Valdas Urbonas deklaroi në Tiranë se njihte mirë lojën e Shqipërisë dhe se e kishte kuptuar se nuk ndryshonte fizionomi, pakkush besonte se Lituania do të mund të merrte pikë në “Air Albania”. Por lituanezët arritën të bllokonin thuajse plotësisht kuqezinjtë në atë ndeshje të një muaji më parë dhe u larguan me tre pikë nga Tirana.
Sot, trajneri i Lituanisë ka insistuar se përgatitja për Shqipërinë do të jetë po njëlloj, pasi pavarësisht ndryshimeve në emra, skuadra kuqezi do të vazhdonte të luante njëlloj.
“Duke parë situatën tonë, ne kemi më shumë besim se në ndeshjen e parë në Tiranë, këto nuk janë fjalë boshe, por të bazuara mbi rezultate dhe jam i lumtur të them edhe në lojën tone. Sigurisht, jemi të ndërgjegjshëm për ndryshimet në radhët e ekipit shqiptar. Mund të flasim për pikën e fortë dhe të dobët të çdo lojtari.
Humbja e kapitenit Elseid Hysaj është shumë e dhimbshme për ta. Ai është padyshim lideri i ekipit kombëtar shqiptar, lojtari më i mrië, zemra e ekipit. Mungesa e tij do të ndjehet, do të jetë e vështirë të kompensohet. Por nga ana tjetër, stili i lojës i trajnerit nuk ndryshon. Me atë që pashë ndaj Kazakistanit, atë që analizuam, kanë të njëjtat parime të organizimit të lojës”, tha Urbonas sot në konferencën për shtyp para sfidës me kuqezinjtë.
Një këmbanë alarmi për trajnerin Reja se kundërshtarët tashmë dinë se çfarë i pret përballë Shqipërisë dhe janë të përgatitur në çdo moment për t’i bërë ballë asaj.