Për herë të dytë brenda një kohe të shkurtër, një tren mallrash ka dalë nga shinat pas një shpërthimi në zonën kufitare ruse pranë Ukrainës. Kompania hekurudhore ruse flet për sabotim.
Në rajonin e Bryansk pranë vendbanimit Belye Berega të martën në mbrëmje, një lokomotivë dhe rreth 20 vagonë dolën nga binarët “për shkak të ndërhyrjes së paligjshme në punën e transportit hekurudhor”, njoftoi hekurudha ruse RZD në Telegram.
Guvernatori i Bryansk, Alexander Bogomas, shkroi për një “pajisje shpërthyese të panjohur” që kishte shpërthyer. Sipas raportimeve të para nuk ka persona të lënduar. Hekurudha nuk përmendi një shpërthim në deklaratën e saj.
Një tren tjetër doli nga shinat në të njëjtin rajon të hënën pasi të panjohur shpërthyen shinat. Që nga fillimi i ofensivës ruse në Ukrainë më shumë se një vit më parë, ka pasur raportime të përsëritura për akte sabotimi në linjat hekurudhore në Rusi. Megjithatë, këtë javë, zyrtarët rusë konfirmuan sulme të këtyre përmasave për herë të parë.