Një konflikt mes tre personave është përshkallëzuar në përdorimin e armëve të zjarrit mëngjesin e sotëm në 8 shtator në Shkodër, duke lënë pas një viktimë dhe dy të plagosur.
Ngjarja e rëndë ndodhi rreth orës 05:30 në lagjen “Kongresi i Përmetit”. 24-vjeçari Y. L. humbi jetën në spital pasi u qëllua me armë zjarri nga 25-vjeçari A. V., pas një konflikti mes tyre.
Nga të shtënat mbeti i plagosur edhe babai i 24-vjeçarit, 63-vjeçari Q. L., i cili ndodhej së bashku me të birin.
Para të shtënave fatale, dyshohet se gjatë përleshjes, babë e bir kanë plagosur me thikë 25-vjeçarin, i cili më pas u kap nga policia. Grupi hetimor po punon për zbardhjen e plotë të dinamikës së ngjarjes.
Njoftimi i policisë
Shkodër/Informacion paraprak
Rreth orës 05:30, në lagjen “Kongresi i Përmetit”, Shkodër, dyshohet se, si pasojë e një konflikti për motive të dobëta, shtetasi A. V. ka plagosur me armë zjarri shtetasit Q. L., 63 vjeç, dhe Y. L., 24 vjeç (babë e bir), ndërsa këta të fundit dyshohet se kanë plagosur me mjet prerës (thikë) shtetasin A. V., 25 vjeç.
Si pasojë e plagëve të marra, shtetasi Y. L., 24 vjeç, ka ndërruar jetë në spital.
Shërbimet e Policisë kanë shkuar në vendngjarje, ku kanë bërë të mundur kapjen dhe shoqërimin e shtetasit A. V., si dhe gjetjen dhe sekuestrimin e armës së zjarrit, pistoletë, që dyshohet se është përdorur në ngjarje.
Grupi hetimor vijon veprimet për sqarimin e plotë të rrethanave të ngjarjes, përcaktimin e përgjegjësive dhe dokumentimin e plotë ligjor të saj.