Shtetet e Bashkuara mund të kenë vendosur të sakrifikojnë Tajvanin…
Sipas një analize të Washington Post, presidenti Donald Trump ka bllokuar këtë verë një paketë ndihmash ushtarake prej mbi 400 milionë dollarësh të destinuara për Tajvanin, në mënyrë që të mos komprometojë marrëveshjen tregtare me Kinën dhe takimin e mundshëm me liderin kinez Xi Jinping, të cilit i jep rëndësi të veçantë.
Vendimi u bë publik pak para një telefonate mes Trump dhe Xi, zhvilluar në orën 8 të mëngjesit në Washington. Temat kryesore ishin e ardhmja e TikTok në SHBA dhe tarifat doganore, por nuk përjashtohet që është diskutuar edhe çështja e Tajvanit.
Një kthesë në politikën amerikane ndaj Tajvanit
Vendimi nuk është ende përfundimtar, por përfaqëson një inversion politik ndaj ishullit që Kina e konsideron territor të vetin. Burimet e cituara nga gazeta shpjegojnë se paketa e ndihmave për Tajvanin do përfshinte municione dhe dronë autonomë.
Megjithatë, Shtëpia e Bardhë ka konfirmuar se vendimi nuk është finalizuar, ndërsa Ministria e Jashtme e Tajvanit është mjaftuar duke theksuar se ka me SHBA-të “bashkëpunim të ngushtë në çështje të ndryshme, përfshirë ato të sigurisë”.
Tajvani nën presionin ushtarak të Kinës
Ushtria amerikane prej kohësh ka investuar në mbrojtjen e Tajvanit, ndërkohë që ushtria kineze po rrit presionin përmes manovrave gjithnjë e më komplekse përreth ishullit. Xi Jinping e ka vendosur në agjendën politike objektivin e “ribashkimit” deri në vitin 2027, megjithëse zyrtarët amerikanë theksojnë se kjo nuk është një datë fikse për pushtim.
“Ky do të ishte momenti më i gabuar që SHBA-të të heqin këmbën nga gazi”, ka deklaruar Dan Blumenthal, ish-zyrtar i Pentagonit dhe aktualisht analist në American Enterprise Institute.
Llogaritë e Trump
Trump ka zgjedhur të ulë tonet me Kinën për të siguruar një marrëveshje tregtare, ndërsa lufta e tarifave po dëmton jo vetëm ekonominë kineze, por edhe atë amerikane.
Fermerët amerikanë, që përfaqësojnë bazën elektorale të Trump, kanë humbur tregun e madh në Kinë. Në lojë janë edhe mikroçipet dhe TikTok, ku një grup investitorësh afër Trump pritet të marrin kontrollin e degës amerikane.
Megjithatë, edhe Republikanët kanë ngritur shqetësime për çdo zbutje të mbështetjes ndaj Tajvanit. Nën administratën Biden, SHBA-të kanë miratuar ndihma mbi 2 miliardë dollarë për Tajvanin, një epokë që tani duket e largët.
Trump, nga ana e tij, synon të zbatojë të njëjtën logjikë si me Ukrainën:
Nëse Tajvani do armë, duhet t’i blejë!