Presidenti amerikan Donald Trump do të takohet javën e ardhshme me homologun e tij kinez Xi Jinping, në kuadër të turit të tij diplomatik në Azi, njoftoi të enjten Shtëpia e Bardhë, duke cituar agjencinë Reuters.
Sipas zëdhënëses së Shtëpisë së Bardhë, Karoline Levitt, Trump do të niset për në Malajzi të premten në mbrëmje dhe më pas do të udhëtojë drejt Koresë së Jugut, ku të enjten e ardhshme pritet të zhvillojë takimin me presidentin kinez Xi Jinping.
Ndërkohë, një takim i mundshëm mes Donald Trump dhe presidentit rus Vladimir Putin nuk përjashtohet, tha Levitt gjatë një konference për shtyp.
“Presidenti dhe e gjithë administrata shpresojnë që në një moment i tillë takim të ndodhë përsëri, por duam të sigurohemi që prej tij të ketë rezultate konkrete dhe pozitive,” deklaroi ajo.
Trump kishte njoftuar të mërkurën se kishte anuluar një takim të planifikuar me Putinin, për shkak të mungesës së progresit në përpjekjet diplomatike për t’i dhënë fund luftës në Ukrainë.
Sipas zëdhënëses së Shtëpisë së Bardhë, presidenti amerikan është gjithnjë e më i zhgënjyer nga mungesa e hapave të Rusisë drejt paqes, ndërsa vendimi për vendosjen e sanksioneve të reja ndaj Moskës mbetet në dorën e tij.
“Shtëpia e Bardhë vlerëson se presidenti Trump nuk ka parë ende veprime të mjaftueshme nga pala ruse dhe për t’i dhënë fund luftës, duhen vepra, jo vetëm deklarata,” shtoi Levitt.