Presidenti amerikan Donald Trump ka kërcënuar të hedhë në erë të gjithë fushën iraniane të gazit Pars nëse Teherani hakmerret ndaj sulmit masiv të Izraelit në të njëjtën zonë një ditë më parë.
Trump tha se Shtetet e Bashkuara apo Katari nuk kishin asnjë dijeni për sulmin izraelit në fushën e Iranit dhe theksoi se do të ishte një gabim i madh nëse Irani do të kundërpërgjigjej ndaj vendeve të tjera të rajonit.
“Nuk do të bëhen më sulme nga Izraeli ndaj fushës jashtëzakonisht të rëndësishme dhe të vlefshme South Pars, përveç nëse Irani vendos pa menduar të sulmojë një vend shumë të pafajshëm. Nëse Katari sulmohet përsëri, do ta hedhim në erë të gjithë fushën”, tha Trump.
Për t’iu përgjigjur Izraelit, Irani nisi një valë sulmesh ndaj infrastrukturës energjetike të vendeve të rajonit, përfshirë fushën më të madhe të gazit në botë në Katar, gjithashtu edhe Arabinë Saudite.
Pas Katarit, edhe ministri i Jashtëm saudit reagoi ashpër duke thënë se vendi i tij rezervon tashmë të drejtën për t’iu kundërpërgjigjur ushtarakisht Iranit.
“Ne do ta kundërshtojmë zjarrin politikisht dhe moralisht. Por ne kemi rezervuar të drejtën për të ndërmarrë veprime ushtarake. Dhe nëse vjen koha, udhëheqja e mbretërisë do të marrë vendimin e nevojshëm. Nuk do të hezitojmë të mbrojmë vendin dhe burimet tona ekonomike”, tha ministri i Jashtëm i Arabisë Saudite.
Deklaratat vijnë pas një takimi të ministrave të jashtëm nga 12 vende myslimane në Riad të cilët dënuan sulmet e Iranit ndaj fqinjëve të Gjirit, duke bërë thirrje për ndërprerje të menjëhershme të tyre.
Synimi i Iranit ndaj zonave të banimit dhe infrastrukturës civile, siç janë objektet e naftës dhe aeroportet, nuk mund të justifikohet në asnjë rrethanë, thanë ministrat në një deklaratë.
Sulmet e 24 orëve të fundit kanë rritur edhe më tej çmimet e naftës dhe gazit natyror, ndërsa përshkallëzimi i vendos tregjet globale përballë ndërprerjes së paprecedentë të furnizimit me energji.
Kështu, nafta Brent pësoi një rritje me afro 10 për qind, duke iu afruar kufirit të 120 dollarëve për fuçi.
Pa asnjë shenjë të uljes së tensioneve, mediat raportojnë se Trump po shqyrton dërgimin e mijëra trupave të tjerë amerikanë në Lindjen e Mesme, për të rivendosur kalimin e sigurt në Ngushticën e Hormuzit, një pikë kyçe për një të pestën e tregtisë botërore të naftës.