Presidenti amerikan Donald Trump u takua sot në Shtëpinë e Bardhë me Sekretarin e Përgjithshëm të NATO-s, Mark Rutte, ku theksoi qëndrimin e tij të ashpër ndaj Rusisë dhe shprehu pakënaqësinë për vazhdimin e luftës në Ukrainë.
Trump deklaroi se është “shumë i pakënaqur” me Moskën për shkak të konfliktit të zgjatur dhe paralajmëroi vendosjen e tarifave dytësore 100% nëse brenda 50 ditëve nuk arrihet një marrëveshje.
“Jemi shumë të pakënaqur me Rusinë dhe do të vendosim tarifa shumë të ashpra nëse nuk arrijmë një marrëveshje brenda 50 ditësh”, tha presidenti amerikan.
Ai theksoi gjithashtu dëshirën për t’i dhënë fund luftës në Ukrainë, duke shtuar se është “i zhgënjyer” nga presidenti rus Vladimir Putin.
Gjatë deklaratave për media, Trump vlerësoi kapacitetet ushtarake amerikane, duke theksuar se “Shtetet e Bashkuara prodhojnë pajisjet më të mira, raketat më të mira dhe gjithçka më të mirë”. Ai bëri të ditur se SHBA do të furnizojë NATO-n me armë, dhe se aleatët do të paguajnë për to.
Nga ana e tij, Sekretari i Përgjithshëm i NATO-s, Mark Rutte, u shpreh se ky është një zhvillim i rëndësishëm për mbështetjen ndaj Ukrainës. Ai theksoi se kjo nismë do t’i mundësojë vendit të sulmuar të sigurojë “një numër vërtet të madh pajisjesh ushtarake”, përfshirë mbrojtje ajrore, raketa dhe municione.
Rutte e cilësoi vendimin si një “lajm të shkëlqyer për Ukrainën” dhe falënderoi Presidentin Trump për angazhimin e tij.