Presidenti amerikan Donald Trump ka ashpërsuar retorikën ndaj Iranit, duke e cilësuar vendin si një “komb të dështuar” dhe duke sulmuar drejtuesit e tij pas përshkallëzimit të ri ushtarak mes dy vendeve.
Në një postim në rrjetin e tij social Truth Social, Trump tha se lidershipi iranian është në “rrëmujë totale” dhe se, sipas tij, nuk është në gjendje ta përfaqësojë siç duhet vendin.
Deklarata e presidentit amerikan vjen pasi SHBA-ja dhe Irani shkëmbyen sulme gjatë natës. Forcat amerikane goditën objektiva iraniane në ishullin Larak, ndërsa Irani u kundërpërgjigj me sulme me raketa ndaj bazave amerikane në Jordani.
Përshkallëzimi i fundit shënon rikthimin e përplasjeve të drejtpërdrejta pas një periudhe relativisht të qetë, ndërsa Ngushtica e Hormuzit mbetet një prej pikave më të nxehta të konfliktit.
Në të njëjtën kohë, administrata Trump po shton edhe presionin ekonomik ndaj Teheranit, me sanksione të reja që synojnë rrjetet financiare dhe institucionet që bashkëpunojnë me Iranin.