Presidenti i SHBA-së, Donald Trump, ka zhvilluar një bisedë telefonike me presidentin rus, Vladimir Putin, e cila, sipas Kremlinit, zgjati rreth 90 minuta. Ky ishte komunikimi i katërt mes dy liderëve gjatë këtij viti.
Sipas këshilltarit për politikën e jashtme të Kremlinit, Yuri Ushakov, telefonata ishte “shumë konstruktive” dhe nisi me urimet e Putinit për Trumpin dhe popullin amerikan me rastin e 250-vjetorit të Pavarësisë së Shteteve të Bashkuara. Ushakov tha se gjatë bisedës u përmend edhe “kontributi i Rusisë në formimin e shtetit amerikan”, si dhe rëndësia e respektimit të historisë së përbashkët.
Në qendër të diskutimeve ishte edhe lufta në Ukrainë. Sipas Kremlinit, Trump ka riafirmuar gatishmërinë e administratës së tij dhe të të dërguarve Steve Witkoff dhe Jared Kushner për të ndihmuar në gjetjen e një zgjidhjeje diplomatike të konfliktit.
Nga ana tjetër, Moska ka përsëritur se çdo marrëveshje duhet të marrë në konsideratë “qëndrimet e saj parimore”, duke lënë të kuptohet se kërkon njohjen e pretendimeve të saj territoriale në rajonin e Donbasit.
Kremlini pretendon se forcat ruse po avancojnë në front dhe po marrin nën kontroll zona të reja në rajonin e Donetskut, ndërsa Kievi i kundërshton këto pretendime, duke deklaruar se luftimet vazhdojnë dhe se sulmet ruse po zmbrapsen.
Telefonata mes Trump dhe Putin vjen vetëm pak ditë para samitit të NATO-s që do të zhvillohet më 7-8 korrik në Ankara, ku lufta në Ukrainë dhe mbështetja për Kievin pritet të jenë ndër temat kryesore të diskutimit.
Mediat ruse e kanë paraqitur këtë bisedë si një sinjal politik me rëndësi, duke sugjeruar se Uashingtoni mund të mbajë një qasje më të hapur ndaj negociatave me Moskën. Ndërkohë, zëra kritikë në Rusi, përfshirë ish-presidentin Dmitrij Medvedev, kanë theksuar se SHBA-ja nuk duhet të marrë vendime në emër të vendeve të tjera.
Moska vijon t’i konsiderojë Shtetet e Bashkuara një faktor kyç në zhvillimet e luftës në Ukrainë, veçanërisht në prag të samitit të NATO-s në Ankara.