Pas deklaratave të bëra së fundmi nga Presidenti turk, Erdogan i cili tha se nuk e shihte pozitivisht integrimin e Suedisë dhe Finlandës në NATO, sot ka ardhur një tjetër reagim nga Turqia ku tentohet që të zbuten tonet ndaj këtyre dy shteteve.
Ishte vetë këshilltari i Erdoganit, Ibrahim Kalin, i cili në një reagim për “New York Times” u shpreh se Turqia nuk është kundër anëtarësimit të dy vendeve skandinave në NATO, por duhet sipas tij që çdo aleat të marrë në konsideratë shqetësimet për sigurinë që ka secili.
Kalin iu referua PKK-së, e cila sipas Erdoganit strehohet në Suedi. Erdogani tha dje se Turqia nuk e shihte pozitivisht anëtarësimin e dy shteteve skandinave në NATO pasi sipas tij ato strehonin organizata terroriste duke iu referuar PKK-së së kurdëve.
Kjo deklaratë nxiti shumë reagime në botë duke bërë që përmes një tjetër reagimi sot, këshilltari i Erdoganit të përpiqet të zbusë pak qendrimet.