Një 35-vjeçare nga Albany, Nju Jork, është arrestuar nga FBI dhe akuzohet se kishte planifikuar një sulm me bombë ndaj Kapitolit të Shtetit të Nju Jorkut, me synim vrasjen e ligjvënësve.
Jessica Bowie përballet me akuzën për tentativë për të ofruar mbështetje materiale për ISIS-in. Sipas autoriteteve amerikane, ajo kishte shprehur besnikëri ndaj organizatës terroriste dhe kishte diskutuar me një informator të FBI-së mënyra për të fshehur një pajisje shpërthyese në një çantë shpërndarjeje ushqimesh.
Hetuesit thonë se Bowie kishte nisur të monitoronte ndërtesën e Kapitolit dhe zonën përreth saj. Nga 21 korriku deri më 9 gusht, ajo dyshohet se e vizitoi rreth pesë herë, duke fotografuar zonën dhe duke vëzhguar masat e sigurisë.
Sipas FBI-së, ajo kishte shprehur synimin për të shkaktuar sa më shumë dëme dhe për të vrarë senatorë gjatë një seance. Për këtë qëllim, ajo dyshohet se bleu materiale që besonte se do të përdoreshin për ndërtimin e një bombe, ndërsa gjithashtu dorëzoi çanta DoorDash që, sipas hetuesve, do të shërbenin për të fshehur pajisjen.
Autoritetet amerikane bëjnë me dije se planet e saj nuk kufizoheshin vetëm te Kapitoli. Kreu i zyrës së FBI-së në Albany, Craig Tremaroli, tha se Bowie dyshohet se kishte diskutuar edhe sulme të tjera, përfshirë një të mundshëm në Times Square gjatë natës së Vitit të Ri, si dhe objektiva të tjera qeveritare.
Sipas hetuesve, pas sulmeve ajo kishte planifikuar të largohej nga Shtetet e Bashkuara dhe të udhëtonte drejt Sirisë.
Bowie u arrestua më 19 gusht, pasi u takua me informatorët e FBI-së dhe pagoi për një armë që ajo besonte se ishte reale. Autoritetet thanë se pajisja shpërthyese dhe arma ishin çaktivizuar më parë si pjesë e operacionit.
Pas arrestimit, në posedim të saj u gjetën thika dhe një deklaratë besnikërie e shkruar me dorë ndaj ISIS-it.