Dy të rinj u vranë mbrëmjen e të hënës në Shkozet të Durrësit nga një atentat me armë zjarri. Ngjarja e rëndë ndodhi rreth orës 18:55, në lagjen nr. 14, në afërsi të tregut të fruta-perimeve.
Sipas informacioneve të Policisë, viktimat janë identifikuar si Dorjan Shkoza, 35 vjeç, dhe Anxhelo Avdia, 24 vjeç. Ata dyshohet se janë qëlluar me breshëri automatiku, ndërsa kanë humbur jetën si pasojë e plagëve të shumta që kanë marrë në trup. Menjëherë në vendngjarje kanë mbërritur forca të shumta Policie, si dhe grupi hetimor. “Paraprakisht dyshohet se është qëlluar nga një automjet në lëvizje.
Shërbimet e Policisë kanë mundur të identifikojnë targat dhe janë vënë në ndjekje të autorëve”, informoi Policia e Durrësit pas ngjarjes së rëndë. 35-vjeçari Dorjan Shkoza mësohet se është nga Shijaku dhe prind i dy fëmijëve. Pas ngjarjes së rëndë, Policia e qytetit bregdetar ka bërë të mundur shoqërimin e disa personave, të cilët janë marrë në pyetje për vrasjen e dyfishtë.
Ndërkaq, mësohet se gjatë natës janë shoqëruar rreth 45 persona në polici, ndërkohë që policia dyshon se autorët kanë qenë vrasës me pagesë. Një nga pistat e hetimit është ajo e prishjes së pazarave të drogës.
Dorjan Shkoza ka qenë i dënuar më herët për trafik të lëndëve narkotike.