Kreu i Partisë Demokratike, Sali Berisha, është paraqitur sot në Prokurorinë e Posaçme, pas një kallëzimi për fyerje të bërë ndaj tij nga gjyqtarja e GJKKO-së, Irena Gjoka.
Në një prononcim për mediat pas daljes nga SPAK, Berisha ka sqaruar se është thirrur për të dhënë shpjegime lidhur me deklaratat e tij publike ndaj Gjokës, të cilat ajo i ka interpretuar si fyerje.
Ai akuzoi institucionet për përpjekje për të fshehur të kaluarën e gjyqtares, duke përmendur një vendim të vitit 1996 për shkarkimin e saj, për të cilin, sipas tij, Këshilli i Lartë Gjyqësor ka gënjyer se nuk ekziston.
Sali Berisha: SPAK ishte i shqetësuar se përse unë paskam fyer sipas tyre, Irena Gjokën. U pyeta nëse unë kam bisedë me Alket Hysenin, apo video, ku ai ka dhuruar 500 mijë euro. E kam pyetur Irena Gjokën nëse ka folur me Alket Hysenin për 500 mijë euro. Këtë e mori si fyerje. Këta janë llum njerëzor. Para dy javësh i japin avoketërve të mi vendimin e shkarkimit të Irena Gjokës. Pas dy javësh, gënjejnë deputetët, duke shkruar se KLD nuk ka vendimmarrje më 1996.
KLGJ gënjeu, tha se s’ka vendim të KLD më 1996 për shkarkim të Irena Gjokës. Vetëm sa nuk i thonë ‘virgjëresha e drejtësisë’, në kuptimin moral. Mediat e Ramës shpikin lajm nga policia se nuk është i vërtetë lajmi për Irena Gjokën. Më 2024, Prokuroria thotë se po nis hetim të thelluar dhe më pas përgjigja është se nuk kemi çfarë të hetojmë. Irena ka 5 mbiemra, është dënuar dy herë në Greqi.