U krijua nga shkrirja e fishekëve të 97-s, Këmbana e Paqes rikthehet sërish te Piramida

Këmbana e Paqes pranë Piramidës së Tiranës është kthyer në një atraksion në kryeqytet, por edhe një kujtim simbolik i së kaluarës së hidhur i trazirave të ’97.
Gjatë vizitës me Kryeministrin Edi Rama dhe kryetarin e bordit të Fondacionit Shqiptaro-Amerikan për Zhvillim Michael Granoff, kryebashkiaku Erion Veliaj u shpreh se ajo do të rikthehet sërish pas restaurimit dhe projektit të transformimit të Piramidës, në atë që do të jetë qendra më e madhe e teknologjisë në Ballkan.
Këmbana e Paqes është krijuar nga shkrirja e fishekëve të përdorur gjatë trazirave të vitit 1997 pas rënies së firmave piramidale, kur qindra njerëz humbën jetën. Fëmijët e komunitetit katolik të Zadrimës mblodhën fishekët dhe monumenti u ngrit me iniciativën e ish presidentit Rexhep Mejdani dhe ish-Ministrit të Kulturës Edi Rama. Këmbana jep një mesazh paqeje dhe i bën jehonë jetës kundrejt vdekjes.