Ishte Prilli i vitit 1999. Më shumë se 3000 kosovarë sistemohen nga autoritetet e kohës në rrethin e Matit, kryesisht në magazinat e Rezervave të Shtetit në Komsi, Pallatin e Sportit dhe konviktin e shkollës së mesme “Pjetër Budi” Burrel.
Mes shumë banorëve të shpërngulur ishte dhe familja e Esat Currit, një burrë i fortë, i zgjuar dhe atdhetar. Dy djemtë e tij Feridi dhe Petriti ishin në frontin e luftës, kundër pushtuesit serb.
“Dikush” i solli familjes Curri lajmin e kobshëm, “dy djemtë e bacës janë vrarë në dyluftimet e zhvilluara në Mazgit”.
Dhimbja nuk pushtoi vetëm dy prindërit e Ferid e Petrit Currit, por çdo kosovar që ishte strehuar në Burrel, madje dhe qindra banorë e zyrtarë të Matit.
Drejtuesit e pushtetit lokal dhe miq të familjes Curri organizojnë në oborrin e konviktit ceremoninë mortore të “vdekjes” se Ferid e Petrit Currit.
Sipas traditës së Matit një kafe, një cigare për çdo pjesmarrës në ceremoni. Me radhë njerëzit ngushëllonin baca Esatin:
-Të rroni dhe t’i kujtoni dy djemtë!
Dhe baca kryelartë shprehej: – Kanë rënë për lirinë e atdheut dhe jam krenar!
Lufta mbaroi dhe familja Curri u kthye në vendlindje, në Mazgit. Kur mbërriti në trojet e të parëve mësoi lajmin e vërtetë, në luftë kishte rënë Feridi, ndërsa Petrit ishte gjallë.
Pas luftës familja Curri vijon të mbajë lidhje të forta me matjanët. Vizitat e ndërsjellta vazhdojnë me shumë dashuri dhe mirënjohje.
Pas çlirimit të Kosovës Petriti angazhohet në polici. Ndërkohë sot familjarët japin lajmin e mirë se ai është emëruar gjyqtar, në Gjakovë.
“Petrit Curri është gjyqtar i Republikës së Kosovës, i cili aktualisht shërben si gjyqtar në Gjykatën Themelore në Gjakovë, Dega në Malishevë. Karriera e tij në drejtësi fillon pas përfundimit të studimeve. Ai është diplomuar në fushën e drejtësisë në vitin 2014 dhe ka pasur rezultate të shkëlqyera gjatë studimeve të tij. Pas diplomimit, Curri ka vijuar me angazhimin e tij në fushën e drejtësisë dhe ka përfunduar provimin e jurisprudencës në vitin 2022, tregues i aftësive të tij të thella juridike dhe angazhimit në profesionin e tij. Para se të bëhet një gjyqtar i respektuar, Petrit Curri ka pasur një karrierë të ndritur në policinë e Kosovës”, shkruajnë burime pranë Gjykatës së Gjakovës.
Hasan PASHA