Policia e Lezhës ka arrestuar një burrë të moshuar 80 vjeç, i cili ishte pjesëmarrës në protestë, madje guxoi të hipë edhe në skelën e Kryeministrisë. Në pranga ka rënë Ndue Fuga. Ai u bë në njëfarë mënyre “simbol” në rrjetet sociale, për faktin se në atë moshë hipi në majë të skelës.
Fuga u mor në banesën e tij në Fishtë të Lezhës dhe furgoni i policisë e ka sjellë në Tiranë. Ndërkohë, më herët policia ka thënë se ka arrestuar 15 persona, si dhe 5 të tjerë janë proceduar penalisht në gjendje të lirë, për vepra penale që kanë të bëjnë me prishjen e qetësisë publike dhe shkatërrim të pronës. Mes personave të arrestuar është edhe Florenc Hoxha, një eksponent i njohur i PD-së, i cili ka pasur edhe funksione dikur në Bashkinë e Tiranës, kur kjo ishte në drejtimin e kreut aktual të Partisë Demokratike, Lulzim Bashës.
Në kërkim janë shpallur 7 shtetas, që dyshohet se kanë qenë pjesëmarrës në protestën e opozitës së bashkuar, më datë 16 shkurt 2019, kur protestuesit kanë goditur me skela dhe sende të forta dritaret e godinës së Kryeministrisë. “Arrestimi i tyre u bë pas analizimit të pamjeve filmike, raport shërbimeve dhe provave të tjera të mbledhura, gjatë protestës së djeshme ku pati akte të dukshme dhune”, tha policia. Mbi të arrestuarit rëndojnë veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës”, “Prishja e qetësisë publike”.