Një gjobë prej 5 mijë paund për këdo që udhëton jashtë Britanisë pa një “justifikim të arsyeshëm”, pritet të futet në fuqi javët e ardhshme, si pjesë e masave të reja anti-Covid.
Masat e reja të udhëtimit janë pjesë e një grupi kufizimesh që qeveria britanike publikoi një ditë më parë. Legjislacioni i hartuar do të votohet nga deputetët të enjten, dhe nëse miratohen, ato do të hyjnë në fuqi të hënën e ardhshme më 29 mars.
Sekretari britanik i Shëndetësisë Matt Hancock tha se kufizimet për të udhëtuar jashtë janë të domosdoshme për të shmangur importimin e një numri të madh rastesh dhe variantesh të reja që mund të vinin në rrezik shpërndarjen e vaksinave.
Ligji thotë, “asnjë person nuk mund, pa një justifikim të arsyeshëm, të largohet nga Anglia për të udhëtuar në një destinacion jashtë saj.”
Ekziston gjithashtu një njoftim i ndëshkimit fiks 200 £ për mos plotësimin e një formulari të deklaratës së udhëtimit – duke dhënë detaje personale dhe arsyen e udhëtimit – për ata që planifikojnë të largohen nga MB.
Kufizimet nuk zbatohen për të udhëtuar brenda zonës së përbashkët, e cila përfshin pjesën tjetër të Mbretërisë së Bashkuar, si Republika e Irlandës, “the Channel Islands”, ”the Isle of Man”.
Përjashtimet nga ndalimi zbatohen kur është “e domosdoshme” që një person të punojë, të studiojë, të ofrojë shërbime bamirësie, të përmbushë një detyrim ligjor, të shesë ose të marrë me qira një pronë dhe për disa arsye të kujdesit për fëmijët, mjekësor ose familjar.
Sipas udhërrëfyesit me katër hapa të Boris Johnson, udhëtimi ndërkombëtar pa justifikim të arsyeshëm do të lejohet në Hapin 3, pra jo më herët se 17 maji.
Një ditë më parë kryeministri paralajmëroi se një valë e tretë e rasteve të koronavirusit që po shihet në Francë dhe Itali mund të “arrijë edhe në brigjet tona”.
“Unë pres që ne do t’i ndiejmë ato efekte në kohën e duhur,” tha Johnson duke theksuar nevojën për të administruar shpejt vaksinat me bashkëpunimin ndërkombëtar./Sky News