Mesatarja e uljes së çmimit të naftës gjate dy javëve të fundit është nga 9 ne 10 lek në vendin tone. Kjo është hera e parë që çmimet e karburanteve kanë tendencë uljeje në vend, që nga muaji maj, kur çmimet u rritën disa herë radhazi.
Në pikat e karburanteve, nafta varion nga 188 lek në 189 lek. Pas datës 7 Qershor 2023, kur përfundoi funksioni i Bordit të Transparencës së Karburanteve, çmimi me pakicë ka lëvizur vetëm në rritje. Kjo rritje nuk justifikohet nga asnjë prej treguesve të bursës, as nga Çmimi Platz i Mesdheut, as nga vlera e dollarit amerikan.
Në bursat ndërkombëtare çmimi i karburanteve që prej shtatorit ka rënë ndjeshëm, në muajin e 9-të të vitit shënonte 95 dollarë për fuçi, ndërsa aktualisht çmimi shënon 75 dollarë për fuçi.
Sipas parashikimeve ndërkombëtare, edhe në vitin 2024 kërkesa globale për naftë pritet që të jetë e dobët. Administrata e Informacionit të Energjisë së SHBA-së (EIA) uli parashikimin e saj të çmimit për vitin 2024 për naftën bruto Brent (treguesi referencë i naftës europiane) me 10 dollarë për fuçi.
Brent do të luhatet mesatarisht 83 dollarë për fuçi, parashikoi administrata në një raport mujor, kundrejt një vlerësimi të publikuar muajin e kaluar prej 93 dollarë për fuçi.