Kryeministri Edi Rama gjatë takimit me banorët e Malësisë së Madhe ka vijuar me ironitë e tij. Duke folur për malësorët, Rama tha se ka respekt për ta dhe qeveria do t’i ndihmojë dhe përkrah në agroturizëm, përpunim të bimëve medicinale dhe fusha të tjera të bujqësisë.
“Ju jeni malësor, unë jam katunar, unë jam nga Surreli. Unë si katunar kam shumë respekt për ju malësorët dhe ju them që realisht do bëj ç’është e mundur që me aq sa kemi mundësi, por të mos lëmë asnjë mundësi pa shfrytëzuar, të kemi mbështetje maksimale e mos të ndjeheni vetëm në rrugën e transformimit”, tha Rama.
Ai ironizoi dhe ish deputetin demokrat Flamur Noka, i cili ishte në krye të protestave që po zhvillohen në Shkodër, gjatë takimeve të Ramës. Ai tha se ata që kanë dalë në rrugë, duan t’ju lënë në rrugë e pa punë. “Nuk fusim dot në punë Flamur Nokën se s’ka fermer që e merr”, tha Rama.