Universiteti Yale ka njoftuar një program të ri akademik që do të fokusohet në punën dhe trashëgiminë kulturore të yllit të popit, Beyoncé. Lënda, e titulluar “Beyoncé Makes History: Radical Afriko-American Tradition, Culture, Theory and Politics Through Music”, do të shqyrtojë ndikimin e saj artistik dhe politik nga viti 2013 deri më tani, duke u fokusuar në mënyrën se si ajo përdor muzikën për të ngritur ndërgjegjësimin shoqëror dhe për të theksuar tema të rëndësishme si identiteti, kultura dhe lufta për barazi.
Ky kurs do të ofrohet nga profesorja e studimeve afrikano-amerikane, Daphne Brooks, e cila ka një përvojë të gjatë në analizën e kulturës dhe muzikës së afroamerikanëve. Brooks do të përdorë repertorin e gjerë të Beyoncé, duke përfshirë albumet dhe performancat e saj live, për të krijuar një “portal” që do të ndihmojë studentët të eksplorojnë intelektualët dhe mendimtarët afro-amerikanë, nga Frederick Douglass te Toni Morrison. Ajo synon të lidhë teoritë dhe filozofitë e këtyre mendimtarëve me muzikën e Beyoncé, duke i ofruar studentëve një perspektivë të re mbi mënyrën se si arti mund të nxisë ndryshime sociale dhe politike.
Brooks theksoi se ky kurs do të përqendrohet në “përpjekjet intelektuale të disa prej mendimtarëve më të mëdhenj të kulturës amerikane dhe mënyrat se si ata lidhen me muzikën e Beyoncé”. Ajo shtoi se do të merren seriozisht këto lidhje dhe do të diskutohet se si filozofitë e këtyre mendimtarëve mund të aplikohen në jetën dhe artin e Beyoncé.
Ky nuk është i pari rast që një universitet ofron kurse që studiojnë një artist të famshëm. Më herët, kanë ekzistuar kurse për Bob Dylan, ndërsa disa universitete të tjera kanë ofruar mësime për Taylor Swift dhe ndikimin e saj në kulturën pop. Beyoncé, e njohur për angazhimin e saj politik dhe shoqëror përmes muzikës, tani do të studiohet më në thellësi si një nga artistët më me ndikim në histori.