Chris Brown festoi 32-vjetorin e lindjes ditën e djeshme dhe për këtë rast të veçantë ai organizoi një super festë. Jo me një, as me dy e as me 10, por me plot 500 njerëz, Chris organizoi një festë madhështore për ditëlindjen e tij.
Këngëtari i hitit “Run It” mblodhi të gjithë njerëzit e tij të afërt brenda shtëpisë në San Fernando Vallley në Los Angeles. Mirëpo festa nuk ka shkuar siç duhet dhe këngëtari është përfshirë në telashe me policinë. Sipas “TMZ” policia e Los Angeles kishte marrë shumë raportime nga fqinjët e Chris për muzikë të lartë dhe makina të parkuara keq në zonë.
Policia u shfaq në orën 2 të mëngjesit në shtëpinë e Brown dhe komunikoi me stafin e sigurisë së këngëtarit. Pas ndërhyrjes së policisë, muzika u mbyll dhe festa përfundoi. Policia raportoi se rreth 400-500 njerëz morën pjesë në festë. Pas eventit të madh të gjithë u larguan nga festa me makina luksoze.
Kujtojmë se Chris është përfshirë disa herë në probleme me policinë dhe drejtësinë. Një nga ngjarjet më të bujshme, që mbahet mend nga të gjithë është ajo e vitit 2009. Në mbrëmjen e Grammy Awards ai dhunoi fizikisht artisten e famshme, Rihanna, që asokohe ishte e dashura e tij. Për shkak të dhuëns këngëtares i mbetën shenja të shumta në fytyrë dhe Chris u dënua me gjashtë muaj shërbim në komunitet dhe u urdhërua të qëndronte të paktëm 50 metër larg saj.