Pas vendimit të Këshillit Bashkiak të datës 16 dhjetor për heqjen e depozitave të ujit nga tarracat e pallateve Bashkia Tiranë ka urdhëruar Asamblenë e bashkëshpronarëve dhe administratorët e pallateve të zbatojnë menjëherë vendimin.
Sipas njoftimit të lëshuar Bashkia u ka lënë afat deri më 30 janar të 2020 që të identifikojnë vendet e përshtatshme për vendosjen e depozitave të përbashkëta të ujit.
Ndëse ky detyrim nuk përmbushet brenda këtij afati Bashkia thotë se do të kalojnë në veprim IKMT dhe policinë bashkiake.
Heqja e depozitave do të jetë e përkohshme, thotë bashkia. Ato do të rivendosen vetëm pasi të ketë një akt konstatimi nga ekspertë të ndërtimit që deklarojnë se vendosja e tyre në tarraca nuk është e rrezikshme dhe e përballon konstruksioni i pallatit.
Shqetësimi për depozitat mbi tarracat e pallateve erdhi pas tërmetit 26 nëntorit pasi shumë prej tyre u rrëzuan duke u kthyer në rrezikshmëri për qytetarët.