Aleati i Presidentit Vladimir Putin, Yevgeny Prigozhin i ka dalë në mbrojtje disa pamjeve të tmerrshme të publikuara ku vritet një mercenar i cili dezertoi nga lufta në Ukrainë.
Sipas BBC, Prigozhin ka deklaruar se vdekja e 55-vjeçarit Yevgeny Nuzhin ishte më se e merituar. “Vdekje e një qeni për një qen” – është shprehur ai.
Mercenari njoftoi në shtator se kishte kaluar në anën e Ukrainës. Në videon e publikuar këtë fundjavë, ai tregon se po lëvizte në Kiev, ku një ushtar rus e goditi prapa koke duke e lënë pa ndjenja.
Më pas, ai u zgjua në një bodrum, ku u xhirua edhe videoja. Megjithatë, ai ishte mbajtur si rob lufte nga Ukraina dhe nuk është e qartë se si ishte i lirë të shëtiste nëpër Kiev.
Pamjet e vrasjes së 55-vjeçarit u postuan gjatë fundjavës në kanalin Telegram të lidhur me grupin e vrasësve Wagner, Zona Grey.
Pamjet fillojnë me Nuzhin që përshkruan se si shkoi në front si anëtar i Wagner-it, pasi u rekrutua në gusht. Ai tha se kishte ndërmend të ndryshonte anë dhe “të luftonte kundër rusëve”, dhe më vonë u kap nga ukrainasit.
Pasi u sulmua në Kiev më 11 nëntor, ai humbi ndjenjat dhe u zgjua në bodrumin ku po bëhej filmi.
Pas kësaj, një burrë i paidentifikuar shfaqet duke sulmuar Nuzhin me një vare. Ai bie në tokë dhe më tej goditet për vdekje.
Zoti Prigozhin tha në një deklaratë se Nuzhin kishte “tradhtuar popullin e tij, tradhtoi shokët e tij”.
Ai në mënyrë sarkastike e përshkroi videon si “vepër regjisoriale të shkëlqyer që mund të shikohet në një moment”.
“Unë mendoj se ky film quhet “Vdekja e një qeni për një qen”, shtoi ai.
Ndërkohë Kremlini është përpjekur të distancohet nga video, me zëdhënësin Dmitry Peskov duke thënë se “nuk ishte puna jonë”.