Një baba britanik, vajza e të cilit u mbyt në det në Shqipëri, thotë se ndjen sikur vdekja e saj është “fshirë nën qilim” dhe se nuk do të ndalojë kurrë së luftuari për drejtësinë për të.
George Gannon, 61 vjeç, i tha Sky News se Rebecca, 29 vjeç, nga Stone, në Staffordshire, po zhytej në një turne të organizuar me Qendrën Diving Spiranca në Sarandë shtatorin e kaluar, kur u gjend në vështirësi dhe ndërroi jetë.
Ai tha se ishte “i shtangur” kur iu tha për vdekjen e saj.
“Ne ishim ulur si familje duke parë funeralin e Mbretëreshës, kur na trokitën në derë, hynë dy policë dhe thanë, ‘duhet t’ju themi se vajza juaj vdiq në Shqipëri’”, tha ai. “Nuk kam mundur të qaj akoma, nuk kam mundur të pikëllohem”.
George ka kaluar pjesën më të madhe të 12 muajve të fundit në Shqipëri duke u përpjekur të zbulojë se çfarë ka ndodhur dhe tani është gati të kthehet.
“Nuk do të ndalem kurrë derisa të gjej drejtësinë”, tha ai.
“Është e tmerrshme, nuk kam pasur asnjë ndihmë nga qeveria shqiptare, nuk kam pasur asnjë ndihmë nga qeveria britanike”, tha ai.
“Sapo kam qenë atje duke luftuar për vajzën time pa asnjë ndihmë dhe kur jam përpjekur të kontaktoj me njerëz ata thjesht nuk flasin.
“Është sikur e gjithë situata është futur nën tapet dhe nuk ka ndodhur kurrë, por nuk do të ndalem kurrë, kurrë, kurrë, derisa të gjej drejtësinë”.
Gannon tha se Rebecca kishte dashur të plotësonte 30 zhytje në kohën kur mbushte 30 vjeç. Zhytja në Shqipëri ishte e 29-ta e saj dhe e fundit. Ai dyshon se u desh shumë kohë për të shpëtuar Rebekën, se vdekja e saj mund të ishte parandaluar dhe se vendi ku ajo vdiq ishte vetëm shtatë metra i thellë.
“Ajo ishte zhytur 25-30 metra dhe që ajo të vdiste vetëm në shtatë metra ujë ishte katastrofike,” tha ai.
‘Spiranca’ bëri udhëtime zhytjeje në detin Jon. Kompania duket se nuk funksionon më dhe një gazetar shqiptar i tha Sky Neës se kishte një arrestim.
Një gazetar shqiptar tha: “Prokurorët akuzuan pronarin e kësaj kompanie që ofron zhytje në Sarandë, për shkelje të rregullores së shëndetit dhe sigurisë në punë”.
“Kjo është akuza e vetme dhe në thelb ai vendosi një garanci prej rreth 13,000 £ dhe u lirua me kusht.”
Gazetari tha gjithashtu se sipas ligjit shqiptar prokurorët kanë dy vjet kohë për të përfunduar një hetim dhe për të vendosur nëse do të dërgojnë një çështje në gjykatë.
“Unë ndaj të njëjtin shqetësim me familjen e Rebecca Gannon, duke mos qenë e informuar për shpejtësinë dhe fazën e këtij hetimi në Shqipëri”, tha ai.
“Ky është vërtet një turp i madh për drejtësinë shqiptare”, shtoi gazetari.
“Prokurorët në Shqipëri për fat të keq e nënvlerësojnë rëndësinë për t’i treguar familjes për ecurinë e hetimeve, nuk është si në Britaninë e Madhe kur ndodhi një krim dhe policia cakton një oficer ndërlidhës në familjen e viktimës. Fatkeqësisht, ne nuk e kemi atë në Shqipëri”, tha gazetari më tej.
George, një ish-pronar furrë buke, thotë se i ka kushtuar kursimet e jetës së tij duke u përpjekur të luftojë për drejtësinë në emër të vajzës së tij.
Familja ka krijuar një faqe për financim në Just Giving në përpjekje për të mbledhur fonde për kostot e tyre ligjore.
Një zëdhënës i Ministrisë së Jashtme në Mbretërinë e Bashkuar tha: “Ne po ndihmojmë familjen e një shtetasi britanik, vajza e të cilit vdiq në Shqipëri dhe jemi në kontakt me autoritetet lokale”.