Përmes një statusi në faqen e tyre zyrtare, Urdhri i Farmacistëve të Shqipërisë i bëjnë thirrje organeve ligjzbatuese të vendit, Agjencisë Kombëtare të Barnave dhe Pajisjeve Mjekësore, të ndërhyjnë menjëherë për të ndaluar dhe shkatërruar këtë monopol, që është në dëm të konkurrencës së lirë.
Vaksinat e gripit të cilat ministrja e Shëndetësisë Ogerta Manastirliu i prezantoi me aq bujë, janë në dorën e një farmacie të vetme. Urdhri i Farmacistëve të Shqipërisë ka ngritur këtë shqetësim, duke bërë me dije se vaksinat e gripit që do të duhet të blihen nga të gjithë qytetarët që nuk përfshihen nga shtresat që i përfitojnë falas, shiten vetëm në farmacitë e “Orange farmaci” dhe askund tjetër.
Vetë rrjeti farmaceutik “Orange”, e reklamon marrjen e kësaj vaksine si diçka ekskluzive edhe pse është totalisht në shkelje të normave statusore dhe Kodit Deontologjik Farmaceutik.
Përmes një statusi në faqen e tyre zyrtare, Urdhri i Farmacistëve të Shqipërisë i bëjnë thirrje organeve ligjzbatuese të vendit, Agjencisë Kombëtare të Barnave dhe Pajisjeve Mjekësore, të ndërhyjnë menjëherë për të ndaluar dhe shkatërruar këtë monopol, që është në dëm të konkurrencës së lire.
“Të nderuar kolegë, Bazuar në ankesat që na janë adresuar dhe njoftimeve në rrjete sociale, rezulton se jemi përpara faktit të monopolizimit të tregtimit të vaksinave të gripit siç rezulton dhe nga njoftimi i publikuar në rrjetet sociale, nga një prej rrjeteve farmaceutike. Duke e konsiuderuar këtë veprim si të paligjshmë, në shkelje të plotë të çdo norme statutore dhe Kodit Deontologjik Farmaceutik, i bëjmë thirrje subjekteve të përfshira në këtë veprim monopolist, ta ndërpresin atë menjëherë. U bëjmë thirrje gjithashtu organeve ligjzbatuese të vendit, Agjencisë Kombëtare të Barnave dhe Pajisjeve Mjekësore, të ndërhyjnë menjëherë për të ndaluar dhe shkatërruar çdo monopol, në dëm të konkurrencës së lirë dhe mbi të gjitha në dëm të aksesit të popullatës në marrjen e shërbimit farmaceutik. U bëjmë thirrje gjithashtu, kolegëve farmacistë që ushtrojnë funksionin e drejtuesit teknik apo farmacistëve të punësuar në këto subjekte, të mos bëhen palë me veprimet antiligjore të pronarëve të tyre, por të zbatojnë me rigorozitet dispozitat ligjore dhe statutore ne fuqi. Në rast të kundërt, ndaj tyre do merren të gjitha masat disiplinore, të parashikuara në legjislacionin në fuqi, Statutin dhe Kodin Deontologjik Farmaceutik,”- shkruhet në status.
Por kush fshihet pas kompanisë “Orange Farmaci”?
“Orange Farmaci”, bazuar në të dhënat në QKR, që janë publike dhe të aksesueshme për të gjithë, është në pronësi të një rrjeti ortakësh, duke filluar nga “MEGAPHARMA” me 75% të aksioneve, Arjan Hamiti me 5% të aksioneve, Kushtrim Rudi me 5% të aksioneve, Stavrion Foto me 5% të aksioneve, Juxhin Palla me 5% të aksioneve dhe Denion Shengjergji me 5% të aksioneve. Administrator i kësaj kompanie është Hamiti.
