Kryeministri Edi Rama bëri të ditur pas mbledhjes me drejtuesit politikë të qarqeve në PS se mbrëmjen e kësaj të hëne mbërrijnë dozat e dyta të vaksinës Pfizer, që edhe pse nuk kishte një numër të saktë tha se do të jetë më pak se herën e shkuar.
“Kemi vetëm një spostim në kohë pasi dozat e para të Pfizer do të vijnë në javën e tretë të janarit dhe sipas konfirmimit të fundit të parat mbërrijnë sot në darkë dhe do të vazhdojnë me faza, ndërkohë që jemi shumë afër një marrëveshjeje përfundimtare me AstraZeneca dhe po vazhdojmë kontaktet tona me disa vende. Për momentin mund ta them pa ekzagjerim që skenari i parë i vaksinimit brenda 14 muajsh nuk ka rënë akoma, pavarësisht vonesave objektive që nuk janë të lidhura me ne”, tha Rama.
Ai bëri të ditur se do të vijojë me vaksinimin e mjekëve e infermierëve. “Do vazhdojmë vaksinimin me mjekët dhe infermierët sepse janë ata që kanë radhën të parët. Nuk e kam sot tani në moment se dua të jap shifër të saktë sa do jenë dozat që do të mbërrijnë sot, e rëndësishme është që ne do të vazhdojmë të vaksinojmë të tjerë dhe e rëndësishme është që do duhet rreth një muaj të shohim me qartësi të gjithë procesin. Kështu që mbërrijnë doza më pak se herën e parë, po sidoqoftë e rëndësishme është që fillon vaksinimi i dytë, sepse këtë e kishim ndërkohë të garantuar dhe pa këto doza dhe vazhdojmë me te tjerët”, tha Rama.