Evropa po përballet me një valë të re të nxehti, e cila pritet të çojë temperaturat në nivele rekord për muajin qershor. Kjo është vala e dytë e të nxehtit që prek Evropën Perëndimore brenda më pak se një muaji.
Sipas shkencëtarëve, ndryshimet klimatike të shkaktuara nga aktiviteti njerëzor po kontribuojnë në shtimin dhe intensifikimin e fenomeneve ekstreme të motit, veçanërisht valëve të të nxehtit.
Franca u godit dje nga temperatura jashtëzakonisht të larta, të cilat iu afruan 40°C, ndërsa 35 departamente u vendosën nën alarmin e kuq për valën e të nxehtit, niveli më i lartë i paralajmërimit.
Në një deklaratë televizive, presidenti francez, Emmanuel Macron, u bëri thirrje qytetarëve të tregojnë kujdes ndaj njëri-tjetrit, veçanërisht ndaj të moshuarve, fëmijëve dhe personave që jetojnë të izoluar ose janë më të ekspozuar ndaj rreziqeve nga temperaturat e larta.