Shqipëria do të vijojë të ndikohet nga temperatura të larta gjatë ditëve në vijim, me vlerat maksimale që pritet të arrijnë pranë 36 gradë Celsius në shumë zona të vendit. Kështu u shpreh sinoptikani Hakil Osmani gjatë një lidhjeje Skype në emisionin “Mirëmëngjes Shqipëri”.
Sipas Osmanit, rritja e temperaturave do të ndihet jo vetëm gjatë orëve të mesditës, por edhe në orët e para të mëngjesit. Temperaturat maksimale do të jenë rreth 6 gradë Celsius mbi mesataren klimatike për këtë periudhë të vitit.
“Temperaturat e ajrit do të vijojnë të jenë të larta, duke bërë që jo vetëm në orët e para të ndihet rritja e temperaturave të ajrit, por edhe që maksimumi në rang teritorior të arrijë shumë pranë vlerës 36 gradë Celsius, që janë rreth 6 gradë më të larta se vlerat normale. Edhe në orët e para të mëngjesit kemi rritje të temperaturave, duke bërë që minimumet në zonat malore të ngjiten në 12-13 gradë Celsius, ndërsa në ultësirën perëndimore të luhaten nga 15-21 gradë Celsius”, tha ai.
Sinoptikani theksoi se kjo valë e të nxehtit do të vijojë të ndikojë vendin deri të enjten. Më pas, pritet një tërheqje graduale e masave të nxehta ajrore, duke sjellë ulje të temperaturave në të gjithë territorin.
“Këto temperatura të larta do na shoqërojnë deri ditën e enjte. Më pas ka sinjale që të kemi një tërheqje të kësaj vale të nxehtit, duke bërë që të kemi rënie të temperaturave të ajrit ditën e premte në territorin shqiptar. Temperaturat pritet të zbresin 5-6 gradë Celsius”, u shpreh Osmani.
Megjithatë, edhe pas kësaj rënieje, temperaturat do të mbeten tipike për stinën e verës, ndërsa qytetarët këshillohen të shmangin ekspozimin e zgjatur në diell gjatë orëve të pikut të nxehtësisë.