Ditën e sotme Sali Berisha përmendi emrin e Vali Bizhgës në konferencë me gazetarët, si kandidaten e preferuar të Edi Ramës për presidente.
“Po t’u pyes unë juve se cili ka dalë nga zarfat sekretë emri më i përfolur? A keni dëgjuar ndonjë emër ju? Ua them unë. Nuk keni dëgjuar. Sipas statistikave të Edi Ramës, 2/3 të sekreteve i kanë shkuar Vali Bizhgës. Po çfarë mund të presësh tjetër, në një kohë kur emri i saj nuk figuron në asnjë zarf. Kësaj i thonë zgjedhje. Prandaj i them unë zgjedhje si Cosa-Nostra” tha Berisha.
Disa vite më pare emri i saj u përmend në përgjimet e publikuara nga ‘Zëri i Amerikës’, të dosjes së Arben Çukos, e cila sipas Zërit të Amerikës kishte ndërhyrë te ish-drejtori i burgjeve për emërimet pa konkurs në administratë.
Publikimi i materialeve nga dosja e Prokurorisë së Krimeve të Rënda solli reagimin e ashpër të Ramës, i cili e quajti ‘Zërin e Amerikës’ pjesë të kazanit mediatik shqiptar. Ky reagim i ashpër i kryeministrit ndaj medias amerikane mendohet se lidhet pikërisht me përmendjen e emrit të Vali Bizhgës në artikull.
Ndonëse një person me profil të ulët në publik, Bizhga luan një rol thelbësor në jetën politike të Ramës. Ky fakt është pranuar nga ai vetë kur mori drejtimin e qeverisë, duke njoftuar se me Vali Bizhgën do të punonte krah më krah në Kryeministri, ashtu siç kishte bërë edhe në bashkinë e Tiranës.
Monika Kryemadhi e quan Vali Bizhgën “kryeministja e vërtetë”:
Në emisionin ‘Zonë e Lirë’, Kryemadhi u shpreh: “Vali Bizhga është Kryeministrja e vërtetë, kështu mendoj unë. Është njeriu që bën të gjitha gjërat. Bizhga mendoj se është personi që sakrifikon më shumë nga jeta personale në shërbim të Ramës. Ajo ka qenë nënkryetare e Bashkisë së Tiranës në kohën e Ramës. Në pamje të jashtme të jep përshtypjen si grua e brishtë, por është grua e fuqishme dhe përballon gjithë fluksin e punës. Është një nga njerëzit që menaxhon gjithë axhendën e Ramës. Ëngjëll Agaçi dhe Bizhga i zgjasin jetën Ramës në qeverisje”, tha Kryemadhi.
“Vali Bizhga, në kostumin e një presidenteje që i përshtatet Edi Ramës”, shkruan gazeta shqiptare. Përmendja e emrit të Vali Bizhgës si kandidate për presidente nga Sali Berisha mund të jetë pjesë e lojës politike. Është ende herët për të thënë se kush është e preferuara e Edi Ramës.