Ministri i Brendshëm Bledi Çuçi ka komentuar në seancën e sotme plenare edhe ngjarjen e vetëvrasjes së Ilvi Metës në qelitë e komisariatit të Kavajës.
“Nuk mund të aludoni për vdekjen e Ilvi Metës në burg. Pasi të mbarojnë hetimet dhe gjykata të shprehet nëse nuk binden se ajo ngjarje nuk ka të bëjë fare me asnjë nga aludimet. Po akuzoni shumë rëndë strukturat e policisë së Kavajës sikur ata janë kriminelë, ta lemë pas këtë retorikë të vjetër. Faktet janë të forta, është ekspertiza mjekoligjore, hetimi i bërë i mjekësisë që kanë çuar para drejtësisë dy punonjës policie, dosja është e plotë, prokurori e ka në dorë, janë të filmuara çdo sekuencë, është ndaluar për shkak të gjykatës, është urdhër i prokurorit për ekzekutimin, procesverbal i shoqërimit të të ndjerit, janë të filmuara që në sekondën kur ai është kapur dhe është larguar më pas, janë me kamera, i keni tek raporti”, tha ministri.