Dronë, ekspertë të kapjes së personave në kërkim, qen dhe mjete të tjera të posaçme janë duke u përdorur për gjetjen e një të riu në Amerikë të akuzuar për vrasjen e së fejuarës së tij. Në vetëm 1 javë janë shpenzuar 1.2 milionë dollarë, por pa asnjë rezultat. Ngjarja tragjike ka sjellë edhe një herë pakënaqësitë e amerikanëve ndaj autoriteteve sa i përket trajtimit të dhunës ndaj grave.
Prej datës 11 shtator, kur u shpall e humbur, historia tragjike e Gabyy Petito nga New York ka dominuar titujt e medieve anë e mbanë botës.
Një javë më parë 22-vjeçarja u gjet pa jetë, me trupin e ndarë në disa pjesë, në afërsi të Grand Teton National Park.
Mjekët kanë dalë në përfundimin se ajo është vrarë nga dikush ndërsa mënyrën se si vdiq pritet ta zbulojë autopsia.
Brian Laundrie, i fejuari i Gabby është i dyshuari kryesor për vrasjen e 22 vjeçares.
Të dy të rinjtë kishin ndërmarrë një udhëtim këtë verë për të eksploruar parqet në perëndim të vendit.
Gabby Petito e cila mbante kontakte të shpeshta me të afërmit e saj ditët e fundit të gushtit nuk iu përgjigj telefonatave dhe mesazheve të tyre.
Ndaj kur i fejuari i saj u kthye në shtëpi pa të në fillim të muajit shtator, familjarët e 22-vjeçares kërkuan ndihmën e policisë për gjetjen e Gabby-it.
Kur u pyet fillimisht për fatin e të fejuarës së tij, ai hezitoi të përgjigjej dhe në të njëjtën mënyrë vepruan edhe familjarët e tij.
Por në javën e parë të shtatorit ai është rikthyer në zonën ku u gjet e vrarë e reja. Kanë qenë turistët që kanë konstatuar pjesë të trupit të vajzës dhe menjëherë pas kësaj 23-vjeçari është shpallur në kërkim.
Puna për gjetjen e tij është përqendruar kryesisht në Florida ku për gjetjen e tij autoritetet po përdorin çdo mjet në dispozicion që nga qentë e deri të dronët.
Madje në një javë janë shpenzuar 1.2 milionë dollar për gjetjen e tij. Pak javë para zhdukjes, çifti u ndalua nga policia pas denoncimeve nga turistët se i kishin parë atë të konfliktoheshin fizikisht me njëri-tjetrin.
Në një video që qarkullon në media, Gabby i kërkon ndjesë për sjelljen të fejuarit ndërsa ky i fundit tregon për policinë se ajo i ka lënë një shenjë në fytyre.
Historia e 22-vjeçares ka prekur njerëz në mbarë botën, teksa ka rikthyer vëmendjen te fenomeni i vrasjes së vajzave si dhe te problemi i njerëzve të humbur, shumë prej të cilëve ende nuk janë gjetur nga familjarët e tyre.