Kryeministri Edi Rama e ka quajtur të gabuar veprimin e kreut të policisë së shtetit Ardi Veiu lidhur me publikimin e videos së nënës së 15-vjeçarit për të justifikuar dhunën e përdorur ndaj të miturit. Por shefi i qeverisë thotë se i beson ndjesës së kryepolicit dhe jo siç tha moralistëve.
“Kam konsideratën më të lartë për integritetin, profesionalizmin në këtë rast ka gabuar, pa diskutim. Por jam i prirur ti besoj ndjesës së tij publike dhe asaj që ai dha se sa të gjithë moralistëve të këtij vendi. Është fare e qartë që nuk ishte një përpjekje për të justifikuar dhunën, sepse punonjësi i policisë për të cilin flitej është pezulluar menjëherë dhe është çuar në hetim penal. Pra masa është marrë. Por ishte një përpjekje e keqshpjeguar për të thënë që “Dakord të gjitha, po dhe familja ka përgjegjësinë e vet në edukimin e mirërritjen e brezit të ri”, tha Rama.
