Prona që ka sjellë dy vëllezërit nga Kosova, Mentorin dhe Fatmirin në seancën e ndërmjetësimit, ka shumë rëndësi për këtë të fundit. Me një nacionalizëm të thellë, Fatmiri tregon në “Shihemi në Gjyq” se projekti që ai kishte menduar të investonte në Malin e Robit do të punësonte shumë njerëz. Me lot në sy, ai i drejtohet publikut të “E diela shqiptare” duke bërë thirrje për sensibilizim.
Fatmiri: Kjo nuk është vrasje e imja shpirtërore. Mua nuk më kanë vrarë. Më kanë vrarë fëmijën tim, e kanë vrarë fëmijët tuaj. E kanë vrarë Shqipërinë. Unë prapë i lutem Zotit t’ia falë gabimet atyre. Dhe gjithë atyre që e sollën Shqipërinë në këtë vend. Të gjendet një gjuhë e pajtimit që ky vend të bëhet vend i mirë, i besëlidhjes shqiptare, se kjo ka qenë pasioni im.
Mentori: O vëlla unë ta di shpirtin, ta di zemrën. Të thashë, jam i gatshëm në këtë minutë të vdes për ty, për këtë punë nuk të fal se të kam paralajmëruar.
Në përfundim të “Shihemi në Gjyq”, Mentori i parashtron kërkesën e tij në mënyrë të qartë vëllait, Fatmirit. Ai kërkon investimin për të cilin ka derdhur para në zonën e Malit të Robit 25 vite më parë. Toka, e cila tashmë rezulton që ka blerëse bashkëshorten e Fatmirit, me të cilën po ndahet, duhet të kalojë si fillim në emër të dy vëllezërve. Por si do të jetë reagimi i Fatmirit me këtë kërkesë të vëllait të tij që i bëhet publikisht ?
Eni Çobani: Çfarë kërkoni nga vëllai juaj sot?
Mentori: Unë kërkoj nga vëllai im që si pikë e fundit e shpresës sime të ma japë një fjalë kur unë do ta marr pronën, kur do vijë fundi.
Eni Çobani: Pra ju po kërkoni nga vëllai juaj që kur do merrni atë pjesë të investimit që ju keni hedhur në atë zonë.
Proçedura e mëtejshme, siç shpjegon Eni Çobani, vijon duke arritur një marrëveshje me pronaren e tanishme, Emanuela Muçollin që është bashkëshortja e Fatmirit për të njohur dy vëllezërit si pronarët e vërtetë. Më tej, ata duhet të drejtohen në bashkinë e Kavajës për të marrë informacionet dhe zbardhjen e situatës së masterplanit. Ndërkohë, publiku shpreh përkrahjen e tij ndaj Mentorit.
Eni Çobani: Fatmir, pranon të bësh një deklaratë noteriale për të njohur detyrimin ndaj vëllait, ligjërisht?
Fatmiri: Unë ia njoh, ia jap krejt pronën se kam pasur aq probleme të mëdha sa jam i lodhur. Unë sot jetoj me shpresë të Zotit, duke medituar çdo ditë, duke iu lutur Zotit t’ia falë shqiptarëve gabimet, të pajtohen mes njëri-tjetrit.