Qeveria shqiptare ka miratuar një sërë vendimesh të reja në mbledhjen e zhvilluar më 9 korrik 2026, duke prekur fusha të ndryshme të administrimit publik, ekonomisë dhe zhvillimit rajonal.
Vendimet e Këshillit të Ministrave përfshijnë miratimin e rregullave për komisionet këshillimore që lidhen me dhënien e titujve të nderit. Në fokus ishte edhe procesi i përzgjedhjes së kandidatëve për drejtimin dhe anëtarët e Komisionit të Prokurimit Publik.
Një tjetër vendim i rëndësishëm ishte miratimi i marrëveshjes së zbatimit me Agjencinë Gjermane për Bashkëpunim Ndërkombëtar GIZ për programin “Qendrat për migracion dhe zhvillim”. Qeveria përcaktoi gjithashtu kriteret dhe përfitimet për pushimet e tjera në shërbimin e mbrojtjes nga zjarri dhe shpëtimit.
Në mbledhje u vendos edhe ndryshimi i administrimit të një pasurie shtetërore në Vlorë, e cila kalon nga Agjencia Shtetërore e Kadastrës te Avokatura e Shtetit. Një tjetër vendim lidhet me miratimin e rregullave për verifikimin e shkarkimeve të gazeve me efekt serrë dhe akreditimin e verifikuesve.
Këshilli i Ministrave miratoi edhe disa procese shpronësimi për projekte publike në Morinë dhe në Bashkinë Kavajë. Gjithashtu, disa zona në Bashkitë Fushë-Arrëz dhe Përrenjas u shpallën “Zona me përparësi zhvillimin e ekonomisë malore”.
Agjencia për Media dhe Informim ju njofton lidhur me Vendimet dhe Projektligjet e miratuara në mbledhjen e qeverisë, datë 9 korrik 2026:
Këshilli i Ministrave vendosi:
-Miratimin e rregullave për përcaktimin e kritereve, të procedurave për përzgjedhjen e anëtarëve, funksionimin, si dhe mënyrën e ushtrimit të përgjegjësive të komisioneve këshillimore për titujt e nderit.
-Propozimin Kuvendit të Republikës së Shqipërisë të listës së kandidatëve të kualifikuar për kryetar dhe për 3 (tre) anëtarë të Komisionit të Prokurimit Publik.
-Miratimin e marrëveshjes së zbatimit, ndërmjet Këshillit të Ministrave të Republikës së Shqipërisë, përfaqësuar nga Ministria e Ekonomisë dhe Inovacionit, dhe Agjencisë Gjermane për Bashkëpunim Ndërkombëtar (GIZ) GmbН, si përfaqësuese e qeverisë gjermane dhe agjenci zbatuese, për programin “Qendrat për migracion dhe zhvillim” (ZME).
-Përcaktimin e kritereve, të masës së përfitimit dhe llojeve të pushimeve të tjera, me apo pa pagesë, në shërbimin e mbrojtjes nga zjarri dhe shpëtimin.
-Ndryshimin e përgjegjësisë së administrimit, nga Agjencia Shtetërore e Kadastrës te Avokatura e Shtetit, të pasurisë së paluajtshme nr.50/17-N, zona kadastrale 8605, Vlorë, sipas planimetrisë, me qëllim ushtrimin e aktivitetit, sipas fushës së veprimtarisë.
-Miratimin e rregullores “Mbi kushtet, kriteret dhe procedurat e verfikimit të shkarkimeve të gazeve me efekt serrë të operatorit të instalimit, të operatorit të avionit e të subjektit të rregulluar dhe kushtet, kriteret e procedurat e akreditimit të verifikuesve”. Ngarkohen Ministria e Mjedisit, Ministria e Ekonomisë dhe Inovacionit, Agjencia Kombëtare e Mjedisit dhe Drejtoria e Përgjithshme e Akreditimit për zbatimin e këtij vendimi.
-Shpronësimin, për interes publik, të pronarëve të pasurive të paluajtshme, pronë private, që preken nga realizimi i projektit “Rehabilitimi i shesheve dhe zonave kryesore në afërsi të pikave doganore shqiptare (Pika doganore Morinë).
-Shpronësimin, për interes publik, të bashkëpronarëve të pasurisë së paluajtshme, pronë private, që preket nga realizimi i projektit “Rikonstruksion i trotuareve, lagjja “Sheh””, Bashkia Kavajë.
-Shpalljen “Zonë me përparësi zhvillimin e ekonomisë malore” të disa zonave në territorin e Bashkisë Fushë-Arrëz.
-Shpalljen “Zonë me përparësi zhvillimin e ekonomisë malore” në territorin e Bashkisë Përrenjas