Cilido do të jetë vendimi i gjykatës për masën e sigurisë ndaj tij, Sali Berisha është përgatitur vetë, por ka përgatitur edhe grupimin të cilin drejton.
Ish-deputeti, Belind Këlliçi, i ftuar në një program televiziv tregoi se ish-kryeministri ka qenë në dijeni të “skenarit” që do të ndiqet ndaj tij që prej tre javësh tashmë.
“Në komunikimet e mia me zotin Berisha, ai ka qenë shumë i qartë dhe para tre javësh më ka thënë mua personalisht që do t’i hiqet e drejta e komunikimit me qytetarët,” tregoi Këlliçi.
Anëtari i Kryesisë së PD-së së Rithemelimit tregoi po ashtu se strukturat drejtuese të partisë kanë nisur tashmë përgatiten për përgjegjësinë e shtuar që do të kenë në mungesë të liderit.
Megjithatë, cilido qoftë vendimi, duket se komunikimi i liderit të demokratëve me qytetarët apo aleatët nuk do të mungojë.
“Ka filluar të bëhen përgatitjet për këtë vendimmarrje. Berisha ka qenë i vetëdijshëm, ka anticipuar edhe mënyrën sesi do të komunikojë qoftë me opinionin e gjerë publik, qoftë me bashkëpunëtorët e tij. Do ta shihni në ditët në vijim”, tha Këlliçi.
Sa i përket vendimit të nesërm, Këlliçi shprehet skenari do të çohet deri në fund dhe se Berisha do të izolohet në arrest shtëpie.