Ministri i Mbrojtjes, Pirro Vengu, ka zhvilluar një takim të rëndësishëm me homologun italian, Guido Crosetto, në kuadër të samitit të parë ndërqeveritar mes Shqipërisë dhe Italisë, që po zhvillohet këtë të enjte, më 13 nëntor, në Romë.
Në fokus të bisedimeve ka qenë thellimi i bashkëpunimit strategjik në fushën e mbrojtjes dhe sigurisë, i cili pritet të marrë një shtysë të re me nënshkrimin e marrëveshjes së re të bashkëpunimit dypalësh.
“Shqipëria dhe Italia ndajnë histori, bashkëpunim dhe një perspektivë të përbashkët.
Në kuadër të takimit ndërqeveritar midis dy vendeve tona, pata kënaqësinë të diskutoja me homologun tim Guido Crosetto mbi të ardhmen e bashkëpunimit tonë në mbrojtje dhe siguri, i cili do fuqizohet me nënshkrinim e marrëveshjes së re të bashkëpunimit. Një faqe e re në kapitullin e pasur të partneritetit tonë transadriatik, me vizione dhe interesa të njëmendta mbi sfidat e sigurisë në kontinentin tonë.”, shkruan Vengu.
Ky takim mes dy ministrave u mbajt në kuadër të samitit të parë ndërqeveritar Itali-Shqipëri që po mbahet sot në Romë, ku pritet nënshkrimi i marrëveshjes ndërqeveritare dhe 16 protokolleve teknike që mbulojnë fusha si mbrojtja, energjia, migracioni, shëndetësia, infrastruktura dhe arsimi profesional.