Ministri i Mbrojtjes, Pirro Vengu, deklaroi sot, më 26 janar, se Shqipëria po ndërton strategjinë e saj mbrojtëse dhe po fokusohet në forcimin e Forcave të Armatosura dhe strukturave të Emergjencave Civile. Sipas tij, modernizimi dhe investimi në personel dhe pajisje është një prioritet strategjik për vendin.
“Ministria e Mbrojtjes do të rrisë pagat, që deri në vitin 2029 të arrijmë mesataren e pagave të NATO-s. Synojmë të kemi 30 përqind forca aktive dhe profesionale, dhe po rrisim numrin e të rekrutuarve, që tregon se Forcat e Armatosura shihen si një punë e rëndësishme nga të rinjtë shqiptarë”,deklaroi Vengu.
Ministri bëri me dije se një pjesë e rëndësishme e përpjekjeve të qeverisë është përmirësimi i cilësisë së trajnimit dhe arsimit ushtarak. “Do të investojmë në fazën e dytë të kampusit të Akademisë së Forcave të Armatosura në Tufinë. Akademia do të ofrojë degë master dhe doktorature për çështje ushtarake, duke rritur standardet profesionale. Përveç kësaj, do të vazhdojmë të zhvillojmë kompenentin rezervist për të forcuar strukturat tona”.
Në fushën e emergjencave civile dhe shëndetësisë, ministri nënvizoi rëndësinë e përballimit të krizave. “Emergjencat nuk janë fenomene sezonalë, por një realitet i përditshëm. Kemi rritur buxhetin për përballimin e tyre dhe po investojmë në mjete të reja. Spitali i Traumës dhe reparte të ndryshme ushtarake në mbarë vendin do të pajisen me pajisje më moderne, ndërsa i pari prej mjeteve të reja pritet të mbërrijë brenda këtij viti”.
Gjithashtu, ministri foli për modernizimin e Forcave të Armatosura. “Forcat Detare do të pajisen me anije të reja, ndërsa Forca Tokësore është tashmë e pajisur me armatime moderne, përfshirë raketat Javelin. Këto hapa do të rrisin kapacitetin mbrojtës të vendit dhe sigurinë e qytetarëve”.
Vengu theksoi se strategjia e mbrojtjes shqiptare është e orientuar jo vetëm drejt forcimit të kapaciteteve ushtarake, por edhe drejt krijimit të një sistemi të qëndrueshëm emergjencash civile, që të jetë i gatshëm për çdo situatë, duke përfshirë fatkeqësitë natyrore dhe krizat humanitare.
“Ne nuk shikojmë vetëm të sotmen, por dhe të ardhmen”, përfundoi ministri, duke theksuar se investimet dhe modernizimi do të vazhdojnë në mënyrë të qëndrueshme deri në vitin 2029.