Mbështetësit e Lëvizjes Vetëvendosjes patën arsye të forta për të festuar mbrëmjen e kësaj të diele, me këngë e valle popullore dhe fishekzjarrë.
Numërimi i votave që iu afrua fundit brenda pak më shumë se 3 orësh pas mbylljes së kutive të votimit, nxori partinë e Albin Kurtit fituese të padiskutueshme të zgjedhjeve me gati 50% të votave. Mbështetja për Vetëvendosjen është më shumë se 2 herë më e lartë se Partia Demokratike e Kosovës që ka siguruar mbi 21%, e ndjekur nga Lidhja Demokratike e Kosovës me gati 14% dhe Aleanca për Ardhmërinë e Kosovës me 5.7%. Jashtë Kuvendit mbetet Nisma Socialdemokrate e Fatmir Limajt me 1.7%, shumë larg pragut 5% të përfaqësimit në Kuvend.
Vetëvendosja ka rritjen më të lartë të mbështetjes krahasuar me zgjedhjet e 9 shkurtit, rreth 7%. Partia Demokratike ka rritje të papërfshillshme me më pak se 1%, LDK-ja ka rënie të ndjeshme me mbi 4%, ndërsa AAK është në të njëjtat kuota.
Kjo tregon se ngjyra e kuqe e Vetëvendosjes dominon në shumicën e zonave elektorale.
Ndër të parët që reagoi për rezultatin ishte kreu i LDK-së Lumir Abdixhiku, i cili pranoi përgjegjësinë për rezultatin e dobët të partisë së tij dhe nuk përjashtoi asnjë mundësi, duke nënkuptuar edhe dorëheqjen.
“Duke marrë përgjegjësinë, ditëve në vijim do ta thërras Kuvendin e Jashtëzakonshëm të LDK-së dhe para tij do t’i shqyrtojmë të gjitha çështjet dhe përgjegjësitë që mbaj si kryetar. Rezultati i LDK-së nuk është ai që e kemi pritur dhe dëshiruar. Është moment reflektimi. Kur qytetarët flasin, ne duhet të dëgjojmë”, tha ai.
Ndërsa kreu i AAK-së Ramush Haradinaj, përjashtoi koalicionin paszgjedhor me Vetëvendosjen, ndonëse mund të jetë i panevojshëm.
“Nga ne të dy partitë PDK dhe LDK e kanë një partner dhe jemi të gatshëm të bashkëpunojmë me ta për t’i dhënë vendit shumicën. Ju tregova për cilin opsion qeverisës punojmë”, deklaroi ai.
Për formimin e qeverisë së tij të tretë, Kurti do të bashkëpunojë me pakicat jo-serbe.