Kryeraportuesi për Shqipërinë në Bundestag, Peter Beyer, duke folur për nismën “Ballkani i Hapur”, theksoi se do të ofrohet mbështetje ndaj çdo iniciative që ka në fokus bashkëpunimin mes vendeve të rajonit.
“Në bazë të bisedave të mia jo vetëm gjatë ditëve të fundit në Tiranë, por edhe gjatë bisedave me miqtë e mi përtej Atlantikut mendoj se nëse nisma Ballkani i hapur bëhet me transparencë me një thelb të qartë dhe pozita të barabarta mund të sjellë përparim pasi bëhet fjalë për bashkëpunim rajonal, kjo është një gjë që ne duam ta mbështesim gjithmonë nëse zhvillohet në mënyrën e duhur në vijimësi si të Procesit të Berlinit.”
Sa i përket hapjes së negociatave, ai i bëri thirrje Bullgarisë që të heqë veton e vendosur ndaj Maqedonisë së Veriut.
“Përshëndesim hapat e arrira deri tani nga Shqipëria. Kemi një situatë të turpshme për BE në atë që po ndodh me Bullgarinë. Shqipëria s’duhet të vuaj në këtë proces, ka ardhur momenti të zhbllokohet kjo situatë dhe për këtë i bëj thirrje Bullgarisë të tërheq këtë bllokadë.”