Autoritetet ruse përgatitën një operacion të veçantë për të arrestuar një ish-oficer të policisë së trafikut, i cili pretendon të jetë rimishërimi i Jezusit dhe ka drejtuar një kult të vendosur në thellësitë e Siberisë për tre dekadat e fundit.
Helikopterët dhe oficerët e armatosur sulmuan komunitetet e drejtuara nga Sergei Torop, i njohur për pasuesit e tij si Vissarion, dhe arrestuan atë dhe dy ndihmës të tij.
Komiteti hetimor i Rusisë tha se do ta akuzonte atë për organizimin e një organizate fetare të paligjshme, duke pretenduar se kulti zhvaste para nga ndjekësit dhe i nënshtronte ata ndaj abuzimit emocional.
Torop, 59 vjeç, me flokë të gjatë gri dhe mjekër, u drejtua nga trupat e maskuar drejt një helikopteri. Operacioni përfshiu agjentë nga shërbimi i sigurisë ruse FSB si dhe polici dhe agjenci të tjera. Vadim Redkin, një ish-baterist i epokës sovjetike që njihet si krahu i djathtë i Vissarion, u arrestua gjithashtu, së bashku me një ndihmës tjetër, Vladimir Vedernikov.
Torop, i cili humbi punën e tij si oficer trafiku në 1989, pretendoi se përjetoi një “zgjim” kur regjimi Sovjetik filloi të shembet. Në 1991, ai themeloi një lëvizje të njohur tani si Kisha e Dhiatës së Fundit.
Disa mijëra ndjekës jetojnë në një seri fshatrash të largëta në rajonin e Krasnoyarsk në Siberi. Të kthyerit në kult kanë përfshirë profesionistë nga e gjithë Rusia, si dhe pelegrinë nga jashtë.
“Unë nuk jam Zot. Dhe është gabim të shohësh Jezusin si Zot. Por unë jam fjala e gjallë e Zotit, babait. Gjithçka që Zoti dëshiron të thotë, ai e thotë përmes meje”, tha Vissarion për Guardian në 2002 .
Media ruse raportoi se në ideologjinë origjinale të kultit, Vissarion pretendoi se Jezusi po vëzhgonte njerëzit nga një orbitë afër Tokës dhe Virgjëresha Mari ishte “duke drejtuar Rusinë”, por më vonë ai e deklaroi veten të ishte Jezus.