Drejtuesja politike e qarkut Dibër, zv/kryeministrja Belinda Balluku zhvilloi sot një takim me qytetarë të Matit ku i pranishëm ishte edhe kryeministri Edi Rama. Gjatë fjalës së saj, Balluku u ndal tek investimet e bëra në Mat, të cilin e cilësoi shembull për premtimet e mbajtura.
“Kur vizitoj Matin është një shembull për t’u marrë se cilat janë planet tona dhe sesi ne duhet të punojmë në çdo bashki në të ardhmen. Këtu janë bërë premtime të cilat janë mbajtur, janë shtruar rrugë, janë ndërtuar ujësjellësa, kanalizime, janë rikonstruktuar shkolla dhe plane të rëndësishme kemi për të ardhmen. Këtu nuk qëndron çështja çfarë ka bërë bashkia, këtu çështja qëndron te një frymë që ka komuniteti, matjanët për të mbështetur njëri-tjetrin, për të mbështetur projektet e reja si dhe zhvillimin”, tha Balluku.
Nga ana tjetër, Balluku u shpreh edhe se ata për më tepër janë të qartë që ne kemi vetëm një drejtim, ai është të ecim përpara”. “Asnjë nga matjanët nuk mendon më të shkojë mbrapa dhe jo vetëm socialistët por edhe demokratët. Unë njoh njerëz që për 30 vite kanë qenë tifozë të PD dhe sot sa herë unë i takoj me Gonin na tregojnë zhgënjimet e tyre, pse kanë vendosur mos t’i mbështesin më, pse nuk duan të jenë pjesë e një lëvizjeje, se nuk është as parti më, pse i kanë mbështetur dikur dhe çfarë shpresash i dhanë. Sot ata e gjejnë veten padyshim tek PS. Është në mentalitetin tonë, në edukatën tonë të punës që ne të punojmë për gjithë shqiptarët. Ne nuk i ndajmë qytetet në të majta apo të djathta, ne nuk ndajmë askënd pasi mendojmë që për ne e rëndësishme është Shqipëria”, tha Balluku.