Në Elbasan është edhe ish-kryeministri Sali Berisha, i cili është pritur me entuziazëm nga mbështetësit e tij, me thirrjet “O Sali, o hero, ty gjithë Shqipëria të do”.
Berisha është pritur siç e ka dhe tradita nga disa vajza të veshura me kostume popullore, me ëmbëlsirën tradicionale, ballokumen, të cilën e ka provuar, ndërsa i kanë vendosur dhe një verore në dorë, simbolikë e kësaj feste.
“Urimet më të përzemërt qytetarëve të Elbasanit, për këtë ditë gëzimi, feste për Elbasanin, i cili sot është edhe kryeqyteti i saj dhe mbarë shqiptarët. Këtu sot kanë ardhur pelegrinë nga mbarë Shqipëria, në këtë kontekst, Elbasani është sot kryeqytet i pelegrinazhit shqiptar. Por nuk mund të mos theksoj se kjo ditë, është njëkohësisht simbol i ndërrimit, i lulëzimit, i ndryshimit. Natyra fillon e ndërron kostumin e saj, moti vjen tjetër”, tha Berisha.
Ish-kryeministri Sali Berisha shoqërohej nga Luçiano Boçi, i cili ka dalë fitues në primare për të kandiduar për kryetar të Bashkisë Elbasan. Ndërsa kujtoi se 14 Marsi simbolizon ripërtëritjen dhe ndryshimin, Berisha u bëri thirrje qytetarëve që më 14 Maj të zgjedhin ndryshimin dhe të mbështesin me vonë Boçin.
“Elbasani, sot kryeqyteti i festës së Ditës së Verës. Këtu sot kanë ardhur pelegrinë nga mbarë Shqipëria. Kryeqyteti i pelegrinazhit kombëtar. Kjo ditë është simbol i ndërrimit, lulëzimit, ndryshimit. Natyra fillon dhe ndërron kostumin e saj. Moti vjen tjetër, 14 maji do të ndjekë një ndryshim të thellë dhe qytetarët e Elbasanit do të mbështesin me besim të madh për Qytetar të Parë një intelektual të shquar, një qytetar shembullor dhe një politikan të mirënjohur, Luçiano Boçin për kryetar të bashkisë, për qytetar të qyteti”,-deklaroi ndër të tjera Berisha.