Sjellja në Komisionin e Ligjeve, e “dënoi” deputetin e PD-së, Gazment Bardhi me 5 ditë përjashtim nga punet e Kuvendit të Shqipërisë. Situata ndodhi pasi kryetarja e Komisionit, Klotilda Bushka, hodhi në votim projektligjin për Portin e Durrësit, por u kundërshtua në mënyrë të ashpër nga deputetët opozitarë. Disa ditë më parë, po kjo sekretari pezulloi me 10 ditë nga punimet e Kuvendit, deputetët Edi Paloka dhe Bujar Leskaj, pas përplasjes që ata patën me kryeministrin Edi Rama gjatë seancës së kaluar të Parlamentit.
“Në drejtimin e znj. Klotilda Bushka, ditën e sotme u mblodh Sekretariati për Procedurat, Votimet dhe Etikën, për shqyrtimin e kërkesës së grupit Parlamentar të Partisë Socialiste, lidhur me situatën e krijuar nga deputeti z. Gazmend Bardhi, gjatë zhvillimit të mbledhjes së Komisionit për Çështjet Ligjore, Administratën Publike dhe të Drejtat e Njeriut, të datës 15.11.2022.
Në këtë mbledhje deputeti Bardhi përdori gjuhë jo parlamentare ndaj Kryetares së Komisionit, shoqëruar me veprime agresive, duke dëmtuar paisjet audio në sallën e mbledhjes së komisionit, si dhe keqpërdori dokumentacionin e mbledhjes, duke i hedhur shkresat e mbledhjes drejt Kryetares së Komisionit.
Bazuar në Rregulloren e Kuvendit, neni 63 pika ç dhe neni 65/1, Sekretariati vendosi me 3 vota Pro dhe 2 Kundër, marrjen e masës disiplinore “Përjashtim nga pjesëmarrja në komisione dhe në seanca plenare për 5 (pesë) ditë”, për deputetin z. Gazmend Bardhi”.