Bundesliga gjermane sot ka pasur pak aromë Shqipërie, ose më saktësisht duhej të kishte pasur aromë Shqipërie nëse futbollistët që shënuar tre golat në suksesin 2-1 të Shalkes ndaj Volfsburgut, do t’i kishin thënë “po” ftesës nga përfaqësuesja shqiptare.
Takimi i sotëm ka parë si protagonistë Daniel Kalixhiurin për ekipin vendas dhe Elvis Rexhbecajn për skuadrën mike, të dy futbollistë të cilët në vitin e fundit janë monitoruar nga FSHF. Kalixhiuri, me origjinë arbëreshe, është kontaktuar vjet nga FSHF dhe i është ofruar mundësia që të veshë fanellën kuqezi, pasi pavarësisht ftesave me Italinë nuk kishte zbritur asnjëherë në fushë me të. Por lojtari i tha “jo”, duke vendosur që të mos luajë për kuqezinjtë.
Një “jo” mori FSHF së fundmi edhe nga Rexhbecaj, i cili ka spikatur në këtë edicion dhe po luan me rregullsi te Volfsburg. Lojtari i ka bërë të ditur si Shqipërisë, ashtu edhe Kosovës, se pret që të veshë fanellën e Gjermanisë, ndaj nuk e mendon ftesën kuqezi.
Kalixhiuri ishte i pari që hapi serinë e golave me një penallti në minutën e 8 të duelit, ndërsa Rexhbecaj iu përgjigj në minutën e 20 me një gjuajtje të fortë në hyrje të zonës duke barazuar shifrat. Ndërsa futbollisti i Volfsburg la fushën e lojës në minutën e 72-të, ai i Shalkes la përsëri shenjën në këtë ndeshje, pasi në minutën e 78 shënoi golin e rezultatit përfundimtar 2-1 që i dha suksesin skuadrës së tij.
Tre gola shqiptarë nga ata që kanë refuzuar fanellën kuqezi në një ndeshje të Bundesligës, padyshim diçka e rrallë të cilën nuk do ta shohim shpesh në të ardhmen. /vipsport.al/