Erinda H. është punonjësja e Policisë së Tiranës e cila u merrte para qytetarëve që aplikonin për të marrë shtetësinë shqiptare. Ajo akuzohet për veprën penale “Vjedhja duke shpërdoruar detyrën” dhe është marrë e pandehur nga organi i akuzës së kryeqytetit.
Siç dallohet në pamjet filmike, punonjësja e policisë merr para nga disa shtetas për të cilët Neës24 ka mësuar se ishin qytetarë nga Kosova dhe kishin aplikuar për marrjen e shtetësisë shqiptare.
Shumën prej 200 eurosh policja e fut brenda një flete të bardhë, të cilën e vendos mbi tastierën e kompjuterit. Hetimi për rastin nisi pas shqetësimit të ngritur pranë Shërbimit të Çështjeve dhe Ankesave nga një shtetas i quajtur Mentor Muharremi, në lidhje me ecurinë e procedurave ligjore për përfitimin e shtetësisë shqiptare, pas apelimit nga ana e tij.
Ai ka shpjeguar se bashkë me të vëllanë janë paraqitur në Drejtorinë e Tiranës, ku kanë dorëzuar dokumentet dhe punonjësja e policisë iu ka kërkuar 100 euro secilit, si pagesë për pranimin e aplikimit. 3 javë më vonë, është ankuar babai i tyre, për arsyet se përse pagesa nuk ishte pasqyruar në vërtetimin e lëshuar për dy djemtë e tij.
Nga hetimet ka rezultuar se dy vëllezërit në fjalë ishin të përjashtuar nga një pagesë e tillë, për shkak të origjinës shqiptare të nënës së tyre.
Ndërkohë që në rastet kur duhej paguar një tarifë e caktuar nga aplikantët, ata ishin të detyruar të bënin derdhjen e shumës në një llogari të çelur në një bankë të nivelit të dytë. Nga hetimet e kryera nga prokurori Bledar Valikaj ka rezultuar se shumën prej 200 eurosh e ka përfituar në mënyrë të padrejtë punonjësja e policisë.